年年新年都會去旅行, 每次都係跟團, 哈~! 次次都係去日本添~! 唉~~ 無奈!! 鬼叫我要就我男友咩!!! 佢靜係鍾意行街, Shopping~ 對戶外活動冇乜興趣~!又嫌泰國污糟添~

但係今次死都唔肯呀~! 咁啱有個黎左幾個月既同事係半個泰國人, 咪瞭下佢去一齊玩囉, 兼可以帶下路丫嘛~! 就住我哋就PLAN左去沙美島同曼谷嘞!

佢真係冇介紹錯地方, 果度唔係咁多香港人到既旅遊地方, 太多數係啲外國遊客渡假既地方, 個感覺好舒服, 好relex, 咁先有渡假feel架嘛~! 我哋住果間酒店好靚, 係beach front黎架, 一望出去就係沙灘呀~! 啲水好清, 好多魚仔, 真係未試過一路游水時有啲魚仔係身邊陪你一齊游, 仲望到好清澈既海底添~! 個感覺好正!! 好free~!! 我仲游左出去好遠添~! 嘻~! 但係佢哋嚇鬼我有鯊魚喎~! 哈!! 聽完都驚驚哋添~! 係沙美島留左兩晚, 都係覺得好短, 唔係好夠時間~!

    
沙美島

 想睇多啲咁靚既環境, 就去呢度啦!!→ → http://community.webshots.com/album/548052652FIpHBF

第1日:  由去到泰國機場, 呢個變左身做tour guide既同事, 真係發生左唔少瘀事, 填form啦, 找換貨幣啦, 時間上既配合啦… 種種咁多, 嘻~! 俾我哋串到佢一文不值, 真係攪笑!! 令到初時十足聽佢既說話既我哋, 慢慢咁大打節扣喇~~!

去到沙美島都接近黃昏呀~ 都係周圍咁行吓~! 因為我哋間酒店去熱鬧既中心點都係一段路, 所以我哋4個都要坐農夫車, 嘩~! 好鬼正架! 因為果條咁崎嶇不平既路, 凹凹凸凸, 坐係度果時拋高拋低, 左搖右擺咁, 嘻嘻~~ 不知幾HIGH呀!  去到, 有好多餐廳, 好多酒吧, 好多鬼佬… 呢個海灘比起我住果面既海灘幼細好多, 其實個海灘同珊瑚島呀布吉咁都冇乜分別, 但係分別在冇乜香港人囉, 因為平時聽朋友講一到新年假期去泰國, 同係香港冇乜分別咁, 全部都係香港人, 去得呢啲陽光與海灘既地方, 緊係想擺脫係香港既壓力, 投入同享受一下寫意既環境啦~~! 其實沙美島冇好似其他地方咁有咁多水上活動玩, 咁多珊瑚魚睇, 同埋額外其他消遣娛樂… 但係勝在環境悠美, 俾人一個好清靜活得自在既感覺, 消費又平, 真係一個渡假既好去處~!

到夜晚, 係沙灘上既塔塔米度食海鮮, 面對住海灘, 聽到既海浪聲, 天空上面滿佈閃耀繁星, 有一種好幸福既感覺~ 哈~! 可惜我既伴侶好沒趣地唔識陪我分享呢種感覺丫~! 反而我兩個同事都識欣賞呢個係香港搵唔到既環境~! 果晚我個同事話特登唔叫魚, 大大聲聲話聽日自己釣喎, 聽晚就有大魚食咁喎~! 真係牙刷~! 跟住海灘上有人玩火棒表演後, 做左一個好求奇既腳底按摩, 就坐農夫車返酒店, 沿途望住天空既星星, 好多好光好靚~ 真係好靚!!

第2日:  係昨日, 我哋book左local tour帶我哋去其他島度觀光~! 所以我哋一早起身, 係酒店露天cafe食早餐, 真係寫意~! 鍾意周圍走既我, 自己一個沿住沙灘咁行一路係度影相, 見到有兩個人係海邊係度玩緊浮潛, 跟住大聲叫我過黎一齊玩啦, 好多魚仔咁喎, 仲俾左啲麵包我餵魚, 我緊係一齊玩啦! 真係好多魚, 手揸住既麵包得啲小魚食, 要拋得遠遠既, 啲大魚先會食~! 不過都好開心喇~!

跟住又坐返果架令我好HIGH既農夫車出去~ 果個local tour諗住都會有好多野玩, 因為見到果啲相好似好豐富咁~! 夠鐘喇, 就坐住我最鍾意坐既快艇出去其他島, 我必定係坐快艇艇頭位, 夠食風嘛, 又夠搖喎, 但係嫌唔夠大浪啫, 唔夠”登”呀!! 到左個島, 跟住去玩浮潛, 游左出去, 見到珊瑚魚, 仲見到好多長針既海胆, 響水面度浮下浮下晒下太陽個感覺好舒服~ 玩完, 我又係度游水呀~! 係海灘游水比係泳池易游得多, 唔駛用好多氣力~! 但係啲水好咸~! 個tour跟住就安排食飯, 無啦啦係度抽獎, 又俾我抽中喎, 仲估係乜黎添, 就係獎你冰凍飲品一大罐! 個個係度車~~ 唔係喎, 跟住我同事話, 要諗下喎, 係呢啲咁既島, 人人都係飲水, 要搵一罐冰凍既飲品, 唔係一件容易既事黎架! 哈~! 諗下佢又講得啱喎!!

跟住又好期待咁去釣魚喇~! 其實我同事最初諗住都有返三個鐘左右, 釣夠本~! 但係… 事實冇想像中咁美好既~! 都係留左一個鐘左右就走喇~! 不過好得意喎~! 坐係船上面既我哋釣唔到, 要一路玩浮潛, 一路追住啲魚係度釣, 咁就釣到喎~! 真係攪笑!!! 好無聊咁又去左個島度攤抖~! 真係戇居~! 所以我就周圍影相呀~! 我連隻雞都唔放過, 追到佢氣咳呀~!

最後, 去左政府既魚排, 睇下啲鯊魚呀, 大石班同大海龜, 買左啲魚仔餵佢哋, 我拋左一條魚仔落魚排度, 嚇死我呀~! 果條大東星呀, 突然係水入面跳出黎呀~!  好彩我同事係隔黎扶住我咋, 咪差少少跌落去呀~! 跟住個local tour就完結lu~! 未夠盡興~!

晚飯燒左釣左果啲魚毛黎食~! 哈~! 都ok啦~! 夠鮮~! 飯後, 買左扎煙花玩, 係大初二晚自己放既煙花, 特別燦爛, 特別靚, 好鬼正呀!!

第3日:  由於中午就要離開呢個沙美島喇~! 所以我一早起身, 又去游水, 游去追下啲魚咁~ 哈~! 佢哋醒左, 跟埋黎游水, 佢哋啲傻佬搵左支竹話要黎捉魚喎, 真係低能既~! 上岸見到棵椰子樹, 3 個人用左好多係地下拾既物資, 諗左好多方法, 去摘棷子~! 結果, 王天不負有心人, 摘左2個返黎! 哈~! 但係冇工具開黎食喎! 結果都係遺棄係沙灘上面~! 然後就懐住依依不捨既心情離開呢個咁與世無爭既沙美島呀~! 真係唔捨得走~! 我真係好鍾意呢個地方~!

返去曼谷~! 佢哋3個男人諗住去玩二級方程式, 所以就送左我去做spa先~! 用香薰油黎按摩真係好正, 按完之後成身香噴噴~! 但係佢哋就唔係幾好喇, 返黎接我走時我緊係問佢哋二級方程式正唔正啦~! 竟然.. 就係因為呢個tour guide既關係, 選擇搭的士唔搭GTS, 塞車錯失左啲時間~! 掃興而回~! 嘻~! 我最好人, 我冇串佢~!

跟住就去行左夜市, 係果度食埋飯, 叫左成十八碟野呀~! 完部都清晒呀~! 真犀利~! 然後就坐食塵既”篤篤車”返酒店~!

第4日:  去左市中心行街, 哈~! 我掃左好多Wacol, 咪笑啦~! 比香港平成半呀~! 唔買多幾個點得呀~! 跟住就去左做古法按摩~! 跟住又返去間spa度做熱石按摩, 好鬼正!! 夜晚, 去左china town度食翅同燕窩, 其實都麻麻哋, 叫做到此一遊啦~!

第5日:  上晝去左話係全亞洲最大型既商場度行, 唉~! 好鬼悶~! 不過臨走都掃左幾個Wacol, 嘻! 慢慢等去夠鐘返酒店攞行李去機場度返香港喇!