相信我可以叫一個唔係咁積極既人, 好多事, 往往我都係會等到最後尾先做, 或者唔吹唔做… 我知咁係唔啱, 但係唔知點解改變唔到, 係一個壞習慣~! 可能係自己心散, 令到自己做野好散慢, 唔夠一心專注工作, 成日個心都唔知飛左係邊~! 好多心!~ 所以, 我令到自己有好多野唔能夠勝任啦~!

唉~~! 對於我黎講, 我而家做緊既工作, 為我帶黎好沉重既壓力, 對於工作經驗咁淺既我, 好多野唔識去應付… 真係人都癲呀~! 尤其事過年後, 人流失量大, 往往個心好唔舒服, 需要應對既野多咗, 好多野返轉頭又係自己做返, 呢3年, 都係度不繼循環緊, 點解先可以擺脫而家既環境呢??? 真係一件唔易既事黎~~! 真係好辛苦呀! 有好多決策上既野, 我真係唔知啱定錯, 好怕會影響到公司… 任何事都要我經手去做, 我已經好累喇~! 好多事我都控制唔到呀~ 真係好享往以前打工既日子, 哈~! 一夠鐘就走人嘛~! 好多重擔子唔駛揹上身~!

好羨慕, 過往每個同事, 都可以為自己前途, 為自己進步, 認識多啲野, 離開呢間公司~ 點解”我”唔可以呢???

唔知點解無端端鍾意左梁靜茹啲歌, 追聽返佢既舊碟~ 真係好奇怪, 只不過係有個人送左佢其中既歌俾我聽, 聽聽吓就好鍾意佢啲歌, 越聽越好聽~!

有時可能送歌俾人聽既行動係無意既, 但係聽歌果個人會好留心歌中既意思~! 會去感受~! 人總係有時係咁傻傻地啦~!

事實上, 梁靜茹唱既歌係好用心, 把聲線好甜, 好好聽, 好有feel~!

每件不如意或者不能操縱既事發生, 不自主既情緒會出現, 但係讓時間既過去, 會令明白自己好多, 事情會清晰好多~! 太過著急去處理, 可能會令到件事件攪到一團糟, 兩頭唔到岸咁~! 有啲事真係要時間, 慢慢去思考, 衡量, 明白究竟自己想點, 件事或者其他人既想法係點~! 首先, 控制到自己既情緒好緊要~!!!

每個人想去做每件事都會有佢想達到既目的, 到底究竟係啱定係錯既, 都冇人會知道~! 有時個天會俾好多機會你, 睇下自己會唔會去爭取囉~?

試問有幾多個人係為自己去做事丫?? 相信大部份都係好不自主地係為他人去做緊事, 好多人和事會影響到你自己想去做既決定, 自己又係咩呢? 本身有既枷鎖, 好難解開, 跳出個框框有一定既難度, 人總是慨嘆如何是好呢??

但係人總是悲觀咁落去, 都唔係一個有效去解決心中既疑惑既方法~! 諗野會越黎越極端, 越黎越封閉自己, 生活係痛苦之中~! 點解要令到自己咁呢?? 唔通自己既生存目的就係要咁?? 相信冇人會想係咁~!  為何不試下吸一啖氣, 視野放遠啲呢? 相信人既一生永遠唔會處於一個環境之中~! 現時既環境係咁, 既然暫時冇辦法去改變, 每日唔開心咁過, 何不選擇令到自己開心啲咁過呢?? 相信令自己開心啲, 一定會有方法! 保持到一個開心樂觀既情緒, 心境開朗, 唔好令自己再消極落去, 因為有好多好同唔好既事都要面對, 都要做架啦, 消極只會令意志消沉下去, 唔係一個好既方法, 樂觀積極啲, 接受同承受一切既事, 因為我覺得就算係幾唔好既事當中, 總有啲野係會令自己會學到既, 有得著既, 令到自己人生豐富啲, 感受到好多野, 又豈不是件好事咩?? 人仲有好多階段要行落去, 又會知道每一段係唔好既?? 自己未試過又點知呢?? 有冇希望, 能唔能夠達成心中願望都係操控係自己手上面!! 有啲事執著, 會令自己更加痛苦, 轉牛角尖~!

相信每個人既人生, 都唔係全部都係唔好既, 悲觀既, 總會有好多好既野, 值得珍惜既人係自己身邊, 係自己未發現, 未感受到係對自己咁重要啫~! 又或者係咪每一個人既離別, 先會去感受到或者醒覺呢??  我一定相信每個人既人生, 都係有佢既生存同存在價值既~! 

今朝又學完車呀, 但係真係唔係好掂, 每次都要早上9點去到學車, 成七點幾要起身呀, 都未瞓醒就要學車呀… 唉~~ 冇計啦~! 個師傅話早啲學冇乜人爭位喎~! 考試前果3日呀, 仲要早上8點去到添呀~! 咪6點幾要起身?? 真係好耐未試過咁早起身出門口呀~!

而家學緊泊”S”位, 掉頭, 上斜停車, 哈哈~! 開車停車, 習慣咗個程序大至上冇問題, 但係原來學泊位掉頭, 都只不過是認位, 扭幾多呔咁~! 師傅話最緊要認位支指示桿, 地上既英文字母就可以喇~! 哈哈~! 有少少出貓既感覺~! 唔怪得話駕駛學院合格率高啦~! 但係出到街都冇呢啲咁既指示係度啦~ 實際上自己係咪真係識呢????

相信每一年既情人節, 每一對sweet緊既情侶都會好期盼呢個既日子來臨, 對對方充滿希望咁睇下對方會做啲乜野去過呢個情人節, 特別係女仔添, 女仔係對呢啲日子係敏感啲既~!

同我男友第一年過既情人節, 第一次過慶祝代表我哋兩個一齊既特別節日, 好愛我既佢, 緊係會著緊啲架啦~! 佢送左3份每個女仔都想得到同意義深重既禮物俾我! 可能因為佢為左補償佢過去送俾我果份生日禮物既過失, 哈哈~ 所以咁重手啦! 一紮花, 一條鑽石頸鍊, 一隻鑽石介子~! 係呢啲特別節日收到呢啲禮物既感覺咁特別唔同, 特別有feel既~! 仲要係我第一次收到既鑽石添! 非常開心! 之前真係十分之羨慕其他人架嘛~! 自己買又冇意思啦~!

但係… 哈~! 到第二年開始後既情人節, 男人既通病, 開始唔會咁重視呢個節日, 尤其是啲事業型既男仕~ 唉~! 女人會覺得咁係唔重視佢, 諗一下丫, 咩野叫情人節丫? 唔通呢個節日走去搵阿爸阿媽去陪你慶祝咩!! 總會希望同你鍾意既人過~ 總之你有希望既, 總會帶來越黎越大既失望, 如果冇希望過既, 可能又有機會得到驚喜!! 哈哈~!

等待第二次果日點過既我, 哈~! 俾左啲錢我, 叫我去自己去買佢要送俾我既禮物, 話唔知我鍾意咩喎, 唉~! 籍口! 唉~! 真係冇意思呀~! 好鬼down~! 但係總好過冇丫~ 我經已反影過, 表示強烈既不滿!!!! 價值都唔係一個問題~ 一啲心意都冇!! 識我咁耐都唔知我鍾意啲乜咩?

第三次過既情人節, 知道佢工作係非常之忙, 都已睇淡呢個日子呀~! 哈~! 我知道未有準備買禮物既佢, 我自己走左去買佢要送俾我既禮物, 嘻嘻!!! 我真係非常之咁醒目呀~! 我知佢實冇咋型既, 仲拍手掌添啦~! 唔駛佢煩~! 但係到下晝… 無啦啦有個同事揸住紮花返黎公司喎, 哈~! 俾左個surprise我~! 哼~! 都算佢啦~! 但係俾我鬧佢做乜唔自己攞上黎喎~! 我諗會sweet啲~! 但係佢又話喎, 搵人送上黎係”威”啲喎~!

第四年既情人節由於係我哋處於旅行中…. 去食貴少少既當慶祝埋喇~!

呢年既情人節, 同樣地冇乜特別期望喇~! 今年真係冇乜心去慶祝呀~! 我都冇係度做吓啲小動作特別話佢知黎緊係情人節喇~! 由於工作上有好多野好煩好累, 加上自己既心情都好複雜~! 今年既情人節唔知呢解我覺得係唔想去慶祝呀!~ 

其實我都係覺得心思係最緊要, 從心做既野, 你既愛侶一定唔會有意見既~!

有日下午同一個男人食lunch, 夜晚又同左一個小男孩食晚飯, 我發現呢兩位男性有一個相同既共通點, 都係會將佢一啲想講對你既說話, 同埋一啲心底或者關懷既說話, 鍾意去用第二種既表達方式去話俾你知, 唔敢面對你同你講咁, 好似愛理不理咁, 點解唔可以直接咁講出黎話你知呢?  哈哈!! 可能一個大男人, 已經可以從佢係小男孩果時睇到佢出黎喇~!