“Wing Wing哋”既感覺~ 我都幾鍾意, 尤其是同啲朋友傾吓計, 玩吓骰盅果陣特別好feel~ 唔開心既時候時飲紅酒或者COCKTAIL, 因為比係啤酒快WING既效果~ 本身黎講, 唔係咁鍾意飲啤酒, 就係因為要飲好多支先會俾到我醉既感覺, 同會好飽架~!

以我一個女仔黎講, 都唔知點解我會咁飲得, 我可以一晚無端端飲晒一支紅酒, 都只係有啲Wing, 都未令到我會醉~ 但係我又唔會隨便同其他人飲酒, 都係同一班知己良朋一齊飲會開心啲~ 鍾意飲酒, 但係會好錫身, 始終對身體無益, 所以都會選擇性地飲~ 睇吓咩場合同心情啦~! 咁耐, 我只真係醉過有一次, 仲要嘔果隻添~ 都有成六七年前喇, 哈~! 都係同人玩骰盅, 一杯清喎, 連輸十幾廿板, 果時又唔識詐死喎~! 飲急酒嘛, 乜人都死啦~! 之後就係度瞓, 醒左之後, 啲人話我瞓左成3個幾鐘都唔知呀~! 随即就衝左去廁所嘔喇~! 嘩~! 好死辛苦, 我話過唔會再俾自己醉喇~! 

除左酒醉之外, 唔知大家有冇試過另外一種醉呢? 哈~! 就黎戀愛中帶黎”醉”的感覺~ 果種醉會成日令自己帶黎好開心,好心甜既感覺, 其實都好難形容~! 我諗都要大家試過先知喇~!

當個腦好亂, 諗唔到野既時候, 就好鍾意望住個海, 有埋海風就最好啦~! 有晚同我個friend買左支啤酒, 傾吓計咁, 個feel更加好喎~! 其實果時真係有個衝動掉個酒樽落海呀~! 想將所有既唔開心拋出去嘛!

已經過左一個星期, 同我男友一齊咁耐, 我未試過嬲咁耐架,  以前都係一日起兩日止, 不過, 其實可能都唔係嬲呀, 係好失望, 好傷心.. 佢想拖我隻手, 我都唔願意, 呢個星期, 我一直都避佢, 唔想見到佢, 我個人變得好死, 好少講野, 唔識講笑, 就連把聲都變得溫柔起黎喇!~ 我係度諗緊, 幾時先可以變返以前既我呢??

兩個人一齊生活有咁多幾年, 感情有咁多幾年, 又算係啲咩野呢?? 果番說話令我醒覺到…. 我哋相處左呢五年多既感情係白費既… 好完全哋佢一啲都唔明白我, 一啲都唔了解我…. 我真係好傷心~ 我唔想去解釋喇~! 佢唔明白我係一個點既人, 唔明白我係公司裏面好多角色矛盾~ 我一直都冇出聲, 係咁流眼淚, 佢一路係咁講冇理過我, 冇停過口, 我阿爸一路係咁維護我, 講點解我要咁, 一路安慰我叫我唔好喊, 佢要咁係睇我, 咁話我, 我都冇辦法~ 事情係咪真確? 都唔重要喇! 到底.. 我係佢間公司度工作, 究竟係為左啲咩呢?? 原來都係吃力不討好~ 我哋既感情生活早早已經融入左工作之中, 互相都有擊連~ 我哋兩個人一齊拍拖, 又係啲咩呢?? 就係為左工作?? 可以原諒佢既, 係佢不嬲個人個心唔夠細, 睇得好表面, 好單純.. 到底.. 係冇可能懷疑我既立場, 原來係佢身邊, 根本我同其他人既睇法冇分別!

其實我可以相信邊個呢? 自己認為既野, 到底…可能都係自以為是啫~ 一個人對你講既說話, 可以信幾多成呢? 其實大概從佢既表現可以推測到, 都係將心彼己啫~! 一個人話要同你係埋一齊, 又為何要咁”飄”呢?? 唔通? 男人就係咁既?? 要去關心既人, 為何相反會令自己失望呢?? 或者…可能係自己係度自尋煩惱啦!!

今日學車, 操縱架車都開始成熟~! 好攪笑~ 紅燈, 停車, 前面都有3架學車, 到綠燈, 其實明明我架車都可以過埋, 但… 嘻~ 前面記住係3架學車, 我諗佢哋開車吊隔合器仲未成熟喇~! 好慢~! 我一開車就諗住過到喇, 所以冇留意燈號, 我駛到過去, 都轉返紅燈喇~! 我同個師傅都一齊係度笑~

以前我處於既環境, 而家我處於既環境, 同我將來處於既環境… 我相信會冇唔同.. 都係不停咁係度工作, 每日既事都令到我情緒好暴燥, 就算我點樣操制自己情緒都好啦~ 第二日又係咁~! 有時同啲friend出黎傾吓,癲吓, 叫吓咁.. 有時又做吓游下水吓咁… 有時自己一個鍾意周圍漫無目的咁行街或者靜靜咁望住個海, 吹下海風.. 咁令心情舒緩啲~~ 其實我覺得我自己既情緒都開始出現問題, 一星期七日都處於工作之中既狀態, 真係令我抖唔到氣喇~ 每次都係為左工作, 令到自己做唔到自己要去做既事, 就算放工, 同我男友走, 就係佢係我身邊既每一分每一秒, 個腦都係響度工作緊, 談既.. 都係公事多, 所以我對佢既脾氣真係唔係太好~ 我哋兩個人既相處只在於係工作?? 可以話每日我有既私人時間, 係響我睡眠當中, 我可以發我鍾意發既夢嘛~! 有次我發夢我返工做緊野呀, 好辛苦呀, 當堂醒左呀~!

我男友任何一個時間只會諗住工作上既野, 佢點樣去舒緩自己既壓力呢? 就係每晚飲啤酒? 每日對住我?? 佢又唔會同朋友去街, 又冇乜特別興趣~ 可能我都係幫佢舒緩壓力既方法黎~! 咪點會一日到黑都咁鍾意對住我丫~ 我可以令佢笑, 令佢煩, 令佢嬲, 令佢傻既人啦~ 又可能男人都係犯殘咁鍾意有個麻煩女人係身邊吱吱喳喳咁致開心啦~ 尤其係一齊工作添, 鬧交特別多~!

其實我… 我自己係咪會想接受將來既環境呢? 而家黎講.. 我都受唔住呀~! 精神真係好緊張, 其實係做佢女友唔識合我丫, 定係打呢份工唔識合我呢?

其實我都好怕見到佢, 一見到佢就係工作, 就係壓力….(呢樣做左未? 果樣攪掂未呀咁… ) 唉~! 俾啲私人空間我好冇?? 如果唔想咁, 可以點呢?

清明節果日第一次揸車出街, 哈~! 好正呀~! 好好玩呀~!個feel幾好~! 真係好想快啲考到車牌呀~! 阿sir話我第一次都叫算揸得幾好呀~! 嘻~! 話我好肯踏油喎~! 我諗佢覺得我好似同學泊位果時好唔同~! 因為我果時揸得好慢, 都唔踏油, 靜係靠隔合器去行~! 哈哈~! 不過真係最難係搵路呀~! 我都係靠阿sir叫我轉左就轉左, 轉右就轉右, 哈~! 如果暫時要我諗埋野真係亂晒龍呀~! 不過揸果時好唔低得的的士佬爬我頭, 雙白線都照爬喎~! 哈~! 真係自己識識地揸車, 有啲野見人做得唔啱, 我好自然咁會係度鬧人架~! 哈哈~!